बहुजन सौरभ
शनिवार २३ ऑगस्ट २०२५
थिएटर ऑफ रेलेवन्स - सत्यपथावरील 33 वर्षाचा उत्सव आणि वैचारिक मंथन
पुणे : आज सायंकाळी 6 वाजता, पुण्यातील गांधी भवन, कोथरूड येथे महाराष्ट्र गांधी स्मारक निधी आणि थिएटर ऑफ रेलेवन्स यांच्या संयुक्त विद्यमाने आयोजित 'कला सत्वाचा सत्यपथावरील 33 वर्षाचा प्रवास' या चर्चासत्राने रंगकर्म आणि सत्य यांचा अनोखा संगम अनुभवला. हा कार्यक्रम थिएटर ऑफ रेलेवन्सच्या 33 वर्षांच्या सृजनशील प्रवासाचा उत्सव ठरला, ज्याने कला ही केवळ करमणूक नसून सत्याचा शोध आणि सामाजिक परिवर्तनाचे प्रभावी माध्यम आहे, हे पुन्हा एकदा अधोरेखित केले. गांधी भवनात आयोजित या चर्चासत्राला रंगकर्मी, सामाजिक कार्यकर्ते, विचारवंत आणि सामान्य प्रेक्षकांचा उत्स्फूर्त सहभाग लाभला. कार्यक्रमाची सुरुवात मंजुल भारद्वाज, थिएटर ऑफ रेलेवन्सचे संस्थापक, यांच्या प्रेरक उद्बोधनाने झाली. त्यांनी TOR च्या 33 वर्षांच्या प्रवासाचा आढावा घेताना सांगितले की, 'कला ही सत्याशी संनाद करणारी प्रक्रिया आहे. थिएटर ऑफ रेलेवन्सने सत्याग्रह आणि प्रतिरोधाच्या भावनेतून समाजातील अन्यायाविरुद्ध आवाज उठवला आणि लाखो लोकांना स्वतःच्या अस्तित्वाचा बोध घडवला.' हे सांगताना त्यांनी त्यांच्या या प्रक्रियेत आलेले प्रत्यक्ष अनुभव कथन केलेत. सामाजिक, राजकीय, आर्थिक, सांस्कृतीक विषयावर समाजाची सद्यःस्थिती काय आहे यावर सखोल विवेचन केले. या चर्चासत्रात TOR च्या नाट्य सिद्धांतावर सखोल विचारमंथन झाले. महाराष्ट्र गांधी स्मारक निधीचे डॉ. कुमार सप्तर्षी यांचे सहकारी अन्वर राजन, तेजस भालेराव तसेच मंजुळ भारद्वाज यांचे सहकारी कलावंत अश्विनी नांदेडकर, कोमल खामकर, सायली पावसकर, तुषार म्हस्के, प्रियंका कांबळे हे सहभागी होते. सहभागी वक्तत्यांनी TOR च्या 'स्वराजशाला' उपक्रमाचे कौतुक केले, ज्याने राजकारणाला सात्विक आणि पवित्र धारा मानून सामाजिक जागृती घडवली. थिएटर ऑफ रेलेवन्सचा हा 33 वर्षांचा प्रवास सत्य आणि मानवतेच्या शोधाचा उत्सव आहे. पुण्यातील या चर्चासत्राने हे पुन्हा एकदा सिद्ध केले की, कला ही समाजाला बदलण्याची ताकद आहे. आता ही चळवळ प्रत्येक गावात, शहरात पोहोचवण्याची जबाबदारी आपल्या सर्वांची आहे.
No comments:
Post a Comment